一次無心嘅表白，竟然令到佢同咗我一齊: 第四十章

臨瞓前，我雖然如常咁同chloe傾電話，但個心一直係到諗緊今日發生嘅事。

其實我係因為愛阿靜，所以先幾乎同佢發生關係吖，定抑或我純粹出於男人天性呢……？記得當初我係因為要證明俾電話另一頭嘅chloe睇，我係有人會鍾意我而去同阿靜一齊，咁今日呢？如果我今日真係同佢發生咗關係，但到最後發現自己一直只係利用佢，咁我咪變成一條不折不扣嘅禽獸……？

自問我係一個唔識死心嘅人，即使同咗阿靜一齊，我對chloe依然有種愛意……只係呢份愛而家應該要埋藏係心入面。

「喂，你有冇聽我講嘢架！！！」有呀，咪問我有冇聽你講嘢囉。

「有，咁跟住呢？」





「講完啦！而家就係問你我應該點！」

「嗱，解決問題呢，有個方法好簡單嘅，你而家去ifc玩笨豬跳，但唔好綁橡筋帶，咁就解決到成件事架啦。」

「啫係你乜都冇聽啦！」

其實我真係有聽架！不過接收唔到咋麻。

「咁呢啲睇你點睇架啫。」





「頂你啦！又諗你條女呀？」

Um…某程度上，係嘅…如果唔計你都有出現嘅話。

「唔諗佢唔通諗你咩！」

「唓，好叻咩！你哋今日又去咗邊？」

「佢上咗我屋企養病。」當然唔通話你知，我仲幾乎幫佢打埋針咩。





「又上你屋企…唉，冇啦冇啦，呢個世界又冇咗個良家婦女啦。」

嗱，說話唔係咁講呀大佬，我乜都冇做過架！！！！如果唔計探索人類生命起源之前嘅所有活動…

「屌你，我似啲咁嘅人咩！」

「唔似。你跟本就係！」

「我原諒你嘅無知。」

「其實你同阿靜除咗你屋企仲會去邊架？」

嘩，好問題…公園，海邊，海邊，公園…好似係咁上下啦…

我將呢幾日同阿靜去過嘅地方話哂俾chloe知之後，佢第一個反應係：「點解你咁悶佢都忍到你架呢？」





所以話，真愛呢家嘢你識條春咩！

「個個好似你咁港女啦喎，行街要有冷氣，又要有得坐！」

「頂你吖！有個咁好嘅女仔陪你癲，你前世一定做唔少好事啦！」

「係囉，好彩嗰個陪我癲嘅好女仔唔係你！」不過話雖如此…但我個心始終好想呢幾日同我發生呢一切嘅係chloe…

係跟住落嚟嘅星期六日，阿靜同上星期一樣，都係係我屋企到過。都係玩下啲好公平嘅大富翁，煲碟咁又一日。明明一齊咗唔係好耐，但啲生活已經好似老夫老妻咁。

而阿靜係我屋企無聊嗰陣，就會拎咗我部手機去睇啲sms。由於我份人光明正大，梗係唔怕俾佢見到啲唔見得光嘅嘢啦（唔見得光嘅一早刪哂）！不過我真係唔明，佢日日拎住我部手機睇，但睇親都係啲近期嘅信息，啫係幾乎次次都係睇一樣嘅嘢，乜真係咁好睇咩？

「其實你唔悶架？次次都睇，但次次都係睇埋一樣嘅嘢…」





「鬼叫你咁多女咁多信息咩！」咁都有位入一入我…

「說話唔係咁講呀！女性朋友多啫，女我得你一個咋！」我走埋去阿靜身邊，攬住佢條腰，個頭挨向佢膊頭，一邊陪佢睇信息。

「你估如果我要睇哂啲信息要幾耐吖嗱？」

「冇3粒鐘你都唔洗諗。」

「嘩…你有幾多信息架…」

「唔多，08年到而家咁啦！」

「嘩…你部機用咗咁耐架啦…」

「有感情架麻！講明先呀，你睇返以前啲信息唔俾秋後算帳架…」





結果，阿靜用咗一粒鐘睇哂啲信息之後我身上多咗幾處被家暴嘅痕跡…

「全部都講chloe嘅，咁悶架！」

日日唔同女人你仲驚啦下話…

之後阿靜走埋去電腦面前，打開youtube搵咗首歌----（傻瓜）。

「傻瓜，首歌好啱我哋呀！！」

＜海角天涯 一直到青春變成白髮 我只希望你 只希望你 叫我傻瓜
原來一世聰明 為你變傻>

《浪漫激情，來得快去得快；細水長流，平淡的幸福……》