[惡搞無極限] 就係咁，我同幾個豬朋上左大陸獵金: ３８１　色誘

咁我地應該點先可以把握果個時間走呢，就呢個話題我地開婀左討論，不過呢兩條友仔都係一如既往咁講好多廢話。

「不如我詐病好唔好啊？」阿輝話。

「點解要詐病呢？」我問。

「如果我詐病，佢地就會緊張，會想帶我去睇醫生囉。」阿輝好天真咁講。

「我諗佢地想我地自生自滅多過緊張我地囉。」我毫不顧慮咁同阿輝講。





而阿倫就諗左好耐話：「咁不如等佢送野食黎果陣，我地偷襲佢。」

呢個不失為一個方法，但係……「我想知送野食黎果個人大唔大隻架？」

「好大隻架！而且好高添，差唔多頂到天花。」阿輝搶住答我，而我聽到佢咁講後，就諗偷襲果個人唔知要偷襲幾耐呢……

睇黎呢個方法都幾難……

「定係……我地色誘佢？」阿倫突然好認真咁講。





我聽到阿倫咁講後，用一個難以置信既表情望住佢，「你未玩啦，我第三個無一個係女仔，點色誘一個咁高大既男人啊。」

「邊個同你講過送野食黎果個人係男人啊？」佢地兩個同一時間同我講。

而我聽到佢地呢一句後，望一望佢地，然後望一望呢到個天花，話晒都有成兩米幾咁高，「頭先你地話兩米幾咁高果個人係個女人？」

阿輝同阿倫點一點頭，「係啊，應該有姚明咁高。」

下？一個有姚明咁高既女人黎送餐！？





「所以阿賢，色誘呢一個ＩＤＥＡ　可能ＷＯＲＫ。」阿倫好認真咁講，而阿輝都好認真咁點一點頭話：「係，堅係ＷＯＲＫ。」

ＷＯＲＫ你條毛咩，我地三個好話唔好聽又唔係靚仔又唔係話有咩野特長，點撚樣色誘一個姚明咁高既女人啊，而且……而且你地兩個仆街做咩望住我啊！！！

「阿賢，呢一次就辛苦你拿。」阿倫話。

「加油啊阿賢，你一定得既。」阿輝話。

得你老母啊，我都無話做你地兩個就好似散會咁，快Ｄ再傾過有咩方法啦。